O‘zLiDeP Тошкент вилоят Кенгаши “Аёллар қаноти” томонидан мамлакатимиз мустақиллигининг 27 йиллиги муносабати билан “Азиз ва ягонамсан, жонажон Ўзбекистоним!” шиори остида “Ишбилармон аёл — 2018” кўрик-танловининг вилоят босқичи ўтказилди.

Дастлаб Оҳангарон шаҳри Маданият ва истироҳат боғида иштирокчилар томонидан ишлаб чиқарилган қишлоқ хўжалиги, озиқ-овқат, қандолат маҳсулотлари, аёллар, келинлар ва болалар либослари, зардўзлик, ҳунармандлик ва заргарлик буюмлари кўргазмаси намойиш этилди.

–Вилоят босқичида туман ва шаҳар босқичларида фаол иштирок этиб, ғолибликни қўлга киритган 27 нафар хотин-қиз ўзаро беллашди, — дейди O‘zLiDeP Тошкент вилоят Кенгаши аёллар билан ишлаш бўлими мудири Муяссар Джамолдинова. –Иштирокчиларни баҳолашда эса инновацион лойиҳаларни ҳаётга татбиқ этишдаги фаоллиги, замонавий ишлаб чиқаришни йўлга қўйиш орқали янги иш ўринлари яратгани, экспортбоп ёки импорт ўрнини босувчи маҳсулот ишлаб чиқараётгани ва бошқа жиҳатларга алоҳида эътибор қаратилди.     

Танловда “Сабина-Назар-Кутюр” МЧЖ раҳбари Сабина Абдуназарова 1-ўрин, “Ангрен Этюд Шарқ” МЧЖ раҳбари Муҳайё Алиева 2-ўрин, “Покизахон” ўқув маркази раҳбари Муаттар Баходирова эса 3-ўринга лойиқ деб топилиб, танловнинг республика босқичига иштирок этиш учун йўлланма олди.

Шунингдек, танловда “Замонавий тадбиркор аёл”, “Йилнинг мурувватли ишбилармон аёли”, “Битирувчи қизларга энг кўп иш ўрни яратган ишбилармон аёл”, “Ташаббускор аёл” каби номинациялар бўйича ҳам ғолиблар аниқланди.

Ғолиб ва совриндорлар танлов ташкилотчилари томонидан диплом ҳамда эсдалик совғалари билан тақдирланди.

O‘zLiDeP Тошкент  вилоят

Кенгаши матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!