Osiyo siyosiy partiyalari xalqaro konferensiyasi (ICAPP) Osiyo mintaqasining 370 dan ortiq siyosiy partiyalarini birlashtirib, mintaqaviy va global dolzarb masalalar davlatlarning yetakchi siyosiy partiyalari darajasida muhokama qilinadigan, fikr va tajriba almashiladigan nufuzli platformadir. So‘ngi yillarda O‘zLiDeP bilan mazkur tuzilma o‘rtasidagi xalqaro hamkorlik sezilarli darajada faollashdi.

ICAPP Doimiy qo‘mitasining 2021 yil 3 sentyabrda bo‘lib o‘tgan 36-yig‘ilishida mikro, kichik va o‘rta korxonalarda COVID-19 oqibatida yuzaga kelgan iqtisodiy inqirozdan iqtisodiyotni tiklashga ko‘maklashish maqsadida ICAPPning sho‘ba organi sifatida Ishbilarmonlar kengashini tashkil etish to‘g‘risida kelishuvga erishildi. Ushbu g‘oyani amalga oshirish doirasida Pusan ​​shahrida (Koreya Respublikasi) shu kunlarda ICAPP Ishbilarmonlar kengashining “Iqlim inqirozi davrida Osiyo biznesi imkoniyatlari va muammolari” mavzuida birinchi yig‘ilishi bo‘lib o‘tmoqda. Unda partiyamiz vakillaridan - O‘zLiDeP Siyosiy Kengashi Ijroiya qo‘mitasi rais o‘rinbosari Sardor G’iyosov, partiya faoli tadbirkor Iftixor Ziyoyev ishtirok etayapti.

Partiyamizda ICAPP Ishbilarmonlar kengashi yig‘ilishining tanlangan mavzusi dolzarb hisoblanadi. Zero, dunyo mamlakatlari barqaror rivojlanish istiqbolini belgilovchi aniq tavsiyalarga muhtoj. Bundan tashqari, O‘zLiDeP vakillarining fikricha, iqlim inqiroziga toza va samarali energiyani rag‘batlantirish maqsadida jahon iqtisodiyotini isloh qilish imkoniyati sifatida qarash muhim.

O‘zLiDeP faollari ICAPP Ishbilarmonlar kengashida so‘zlagan nutqlarida ishtirokchilar e’tiborini siyosiy partiyalar nafaqat bugun, balki kelajak avlodlar haqida ham o‘ylashi lozimligiga qaratdi. O‘zLiDeP “yashil iqtisodiyot”ga o‘tish strategiyasini amalga oshirish orqali energiya va resurslarning energiya sig‘imini kamaytirish, ishlab chiqarishga iqtisodiy texnologiyalarni keng joriy etish, qayta tiklanadigan texnologiyalardan foydalanishni kengaytirish, atom energetikasini rivojlantirish tarafdori.

Partiyamiz qayta tiklanuvchi va muqobil energiya manbalaridan foydalangan holda elektr energiyasi ishlab chiqarish ulushini ko‘paytirishni, ishonchli, xavfsiz, tejamkor va samarali elektr energiyasi manbalarini ta’minlashni muhim, deb hisoblaydi. Muhokama chog‘ida O‘zLiDeP vakillari quvvatlarni kengaytirish, ishlab chiqarishni modernizatsiya va diversifikatsiya qilish orqali elektr energiyasi ishlab chiqarishni ko‘paytirishga e’tibor qaratish muhimligini ta’kidladilar.

ICAPP Ishbilarmonlar kengashi yig‘ilishida O‘zLiDeP vakillari yangi tahrirdagi Konstitutsiya loyihasini qabul qilish bo‘yicha umumxalq referendumi jarayoni natijalari, tashabbuskorlaridan biri mamlakat parlamentidagi O‘zLiDeP fraksiyasi faoliyatiga oid savollarga javob berdi. Bular, xususan, inson huquq va erkinliklarini ta’minlashni kuchaytirish, “ijtimoiy davlat” tamoyili va boshqalarni amalga oshirish, alohida ekologik standartlarga oid yangiliklarni qamrab oldi. Yangilangan Konstitutsiyada tabiiy resurslar, jumladan, suv havzalari va yer osti boyliklarini muhofaza qilish talablari mustahkamlangan, shuningdek, Orolbo‘yi hududining ekologik tizimini muhofaza qilish va tiklash, ijtimoiy-iqtisodiy rivojlantirish bo‘yicha chora-tadbirlar ko‘rish kafolatlangan.

Shuningdek, tadbirda O‘zLiDeP vakillari qator xalqaro tashabbuslarni ilgari surdi. Bu, ayniqsa, kichik va o‘rta biznesda vodorod energetikasi infratuzilmasini amalga oshirish va barpo etish mexanizmlari haqida ma’lumotlarning yetarli emasligi bilan bog‘liq. Shu bois Ishbilarmonlar kengashi tarkibida vodoroddan foydalanish sohasida tajriba, texnologiya va sarmoya almashinuvini tashkil eta oladigan maslahat organini tuzishga ehtiyoj mavjud.

Shuningdek, O‘zLiDeP vakillari Ishbilarmonlar kengashi huzurida turli forum va ko‘rgazmalar tashkil etish imkoniyatlarini ko‘rib chiqish tashabbusi bilan chiqdilar. Bu ishtirokchi davlatlarning tashqi savdo aylanmasini kengaytirishga qaratilgan innovatsion loyihalari bilan ishbilarmon doiralar vakillarini birlashtiradi.

Xulosa qilib aytganda, tashkil etilgan ICAPP Ishbilarmonlar kengashi yirik biznes hamjamiyatlari o‘rtasidagi tarmoqlarni kengaytirish orqali mintaqada biznesni rivojlantirish hamda potensial biznes va tijoriy hamkorlikka ko‘maklashishda siyosiy partiyalarning rolini kengaytirishga xizmat qiladi. Shunday qilib, ICAPP partiyalararo hamkorlik orqali iqtisodiy rivojlanishning innovatsion yo‘liga, raqobatni rivojlantirish va qo‘llab-quvvatlashga, tadbirkorlik faoliyati uchun teng imkoniyatlar yaratishga yordam beruvchi raqobatbardosh Osiyo bozorini shakllantirishga hissa qo‘shadi.

O‘zLiDeP matbuot xizmati