O‘zLiDeP Andijon viloyat Kengashi “Ayollar qanoti” tashabbusi bilan “Sarkor-hamkor” oilaviy korxonasida “Qo‘rqmang! O‘z biznesingizni boshlang!” mavzusida davra suhbati bo‘lib o‘tdi.

Unda partiya viloyat Kengashi raisining ayollar masalalari bo‘yicha o‘rinbosari Xurshidaxon Xalilova mamlakatimizda tadbirkor ayollarni qo‘llab-quvvatlash, xususiy sektor vakillariga berilayotgan imtiyoz va imkoniyatlar, O‘zLiDePning ayollar tadbirkorligini rivojlantirishga qaratilgan loyihalari mazmun-mohiyati haqida gapirdi.

– “Sarkor-hamkor” oilaviy korxonasida tikuvchi bo‘lib ishlayman, – deydi Oltinoy Turdiyeva. – Bugungi tadbirdan so‘ng tadbirkorlikni boshlashga bo‘lgan ishtiyoqim yanada qat’iylashdi. Atrofimga tikuvchilikka qiziqqan dugonalarimni olib, ustozim Gulnoza opa kabi yangi korxona tashkil etish niyatidaman.

Tadbir davomida o‘z tadbirkorligini boshlamoqchi bo‘lgan xotin-qizlarga ishbilarmon ayollar – Gulnoza Mirzayeva, Sanobar Rahimova, Gulsumoy Qodirovalar tavsiya va maslahatlarini berishdi.

Umidaxon ISAYEVA,

O‘zLiDeP Andijon viloyat Kengashi xodimi  

O‘zLiDePning Facebook’dagi rasmiy sahifasi va Telegram’dagi kanaliga a’zo bo‘lib, so‘nggi yangiliklardan xabardor bo‘ling!