Соғлом аёлгина  жисмоний бақувват, маънан юксак ўғил-қизларни дунёга келтиради, тарбиялайди, катта ҳаёт сари йўллайди. Улар саломатлигини мустаҳкамлаш учун тез-тез шифокор кўригидан ўтиб туришлари керак. Аммо ҳамма доим ҳам уй бекаларининг шифоатхонага бориб, тиббий кўрикдан ўтишга вақти ва маблағи бўлавермайди. Шу боисдан ҳам партиянинг Чироқчи туман Кенгаши ва Кенгаш хузуридаги Аёллар гуруҳи томонидан “Соғлом оила-мустаҳкам оила” лойиҳаси доирасида ташкил қилинаётган давра суҳбати ва бепул  тиббий кўриклар хотин-қизлар орзиқиб кутадиган анжуманга айланиб улгурган.  

 Чироқчи туман тиббиёт бирлашмасига қарашли кўп тармоқли марказий поликлиниканинг 1-сонли участкасида ташкил этилган мазкур тиббий кўрикда икки юзга яқин хотин-қизлар иштирок этишди. Малакали шифокорлар томонидан ўтказилган текширувда 50 га яқин хотин-қизларда турли касалликлар аломатлари аниқланиб, даволаниш учун шифохоналарга йўлланмалар берилди.  

-“Инсонга эътибор ва сифатли таълим йили”да  ўндан ортиқ мана шундай бепул тиббий кўрикларни ташкил этишни режалаштирганмиз, - дейди O’zLiDeP Чироқчи туман кенгаши раисининг биринчи ўринбосари, аппарат раҳбари. Бугунги тадбирда тумандаги Чоштепа, Ўзбекистон, Чироқчи ва Янгиобод МФЙлар ҳудудида  яшаётган хотин-қизлар иштирок этишди. Келгусида туманнинг чекка ҳудудларида истиқомат қилаётган опа-сингилларимизни ҳам тиббий кўрикдан ўтказиш ниятидамиз.