O’zLiDeP Қашқадарё вилоят Кенгашининг 2023 йил якунларига бағишланган йиғилиши бўлиб ўтди. Тадбирда вилоят кенгаши раисининг биринчи ўринбосари, аппарат раҳбари Арзиқул Шеров сўзга чиқиб, ўтган 2023 йил муҳим сиёсий жараёнларга бой йил бўлгани, партия фаоллари барча йўналишларда самарали фаолият олиб борганликларини алоҳида таъкидлади.

Ўтган йил мобайнида партия қуйи бўғинлари сони 20 тага, аъзолари сони 4132 тага  кўпайди. Хотин-қизларнинг ижтимоий-сиёсий фаоллигини ошириш, жамиятда ўз ўринларини эгаллашларига кўмаклашиш, тадбиркорлик кўникмаларини шакллантириш ва шу орқали бандлигини таъминлаш борасида ҳам ижобий кўрсаткичларга эришилди.  Ёшлар билан ишлаш йўналишида ҳам 20 дан ортиқ партиявий лойиҳалар амалга оширилиб, ёшларни тадбиркорликка жалб қилиш, касб-ҳунарга ўқитиш, бандлигини таъминлаш, бизнес ғояларини қўллаб-қувватлаш борасида қатор амалий ишлар қилинди. 

Халқ депутатлари маҳаллий Кенгашларида 165 нафар депутат фаолият олиб бормоқда. 2023 йил давомида Халқ депутатлари вилоят, туман (шаҳар) Кенгашларидаги партия депутатлик гуруҳи ва аъзолари томонидан жами 925 та депутатлик сўрови ижро органлари мансабдор шахсларига юборилган. Бундан 229 таси вилоят Кенгаши депутатлари томонидан, 696 таси туман, шаҳар  Кенгашлари депутатлари томонидан юборилган.

Ўтган давр мобайнида Халқ депутатлари вилоят, туман ва шаҳар Кенгашларидаги партия депутатлик гуруҳлари йиғилишларида 187 та масала кўриб чиқилган. Партия вилоят, туман ва шаҳар депутатлик гуруҳлари томонидан доимий комиссиялар йиғилиши кун тартибига 184 та, вилоят, туман, шаҳар кенгашлари сессиялари кун тартибига 86 та масала киритилган.  Киритилган масалалар бўйича 184 та доимий комиссиялар ҳамда 90 та Кенгаш сессиялари қарорлари чиқарилган.

Ҳисобот даврида маҳаллий Кенгаш депутатлари томонидан жами 804 маротаба сайловчилар билан учрашувлар ташкил қилинган. Ўтказилган учрашувларда сайловчилар ва аҳоли томонидан кўтарилган 726 та масала депутатлар томонидан ижобий ҳал этилган. 2023 йил давомида депутатларга сайловчилар томонидан жами 788 та мурожаат келиб тушган, шундан 684 тасига мақбул ечимлар топилган, қолган мурожаатлар депутатлар томонидан назоратга олинган.

Сўзга чиққанлар “Ёшлар ва бизнесни қўллаб-қувватлаш йили”да  партия ёшлар билан ишлаш борасида янада фаол бўлиш, партия қуйи бўғинлари фаолиятини янада жонлантириш, илгари сураётган мақсадлари халқчиллигини ошириш, партия аъзоларининг сиёсий билимларини кенгайтириш, депутатларнинг маҳаллалардаги сайёр қабулларини, халқ билан мулоқотларини янада кучайтириш борасида тинимсиз изланиш лозимлиги алоҳида эътироф этишди.