Самарқанд вилояти Оқдарё туманида яшовчи Толибхон Абдужалилов 20 йилдан буён ёнғоқни қайта ишлаш ва олди-сотдиси билан шуғулланади. Президентимизнинг қишлоқ хўжалик маҳсулотларини экспортини йўлга қўйиш тўғрисидаги қатор қарор ва фармонлари, шунингдек, мамлакатимизда тадбиркорлар учун яратилаётган шарт-шароитларни кўриб, 2017 йил апрел ойида “Пичоқчи DRY Fruits” фирмасини очди.

Қаҳрамонимиз ҳозирги кунда  ёнғоқ, мош, ловия, нўхат каби дуккакли  маҳсулотларни қайта ишлаб хорижга экспорт қилмоқда. Т.Абдужалилов Туркия, Бирлашган Араб Амирликлари, Ҳиндистон, Афғонистон каби давлатлардаги тадбиркорлар билан ҳамкорлик қилмоқда. Туркия Республикаси Президенти Ражаб Тоййиб Эрдўғоннинг мамлакатимизга  ташрифи   доирасида икки давлат ўртасида ҳар томонлама келишувларнинг имзоланиши Толиб ака каби тадбиркорларни қувонтириб юборди.

– Туркия Президентининг Ўзбекистонга ташрифини катта ҳаяжон билан кузатдик, – у. – Икки давлат ўртасидаги иқтисодий ҳамкорлик қанча ривожланса, биз тадбиркорларга шунча яхши. Негаки, корхонамизнинг асосий ҳамкорлари туркиялик тадбиркорлар ҳисобланади. Биз тадбиркорлар мамлакатимиз Президентининг қўшни ва қардош давлатлар билан ҳамкорлик алоқаларини мустаҳкамлаш борасида олиб бораётган сиёсатини қўллаб-қувватлаймиз. Чунки бу иқтисодиётимизни янада гуллаб яшнашига хизмат қилади.

Тадбиркор O‘zLiDeP Самарқанд вилояти ва Оқдарё туман Кенгаши ҳамкорлигида “Пичоқчи” қишлоғида лойиҳа қиймати 4,5 миллиард сўм эвазига 3 гектар майдонда қурилиши режалаштирилаётган ёнғоқ етиштириш, уни сақлаш, қайта ишлаш, экспортга тайёрлаш, шунингдек маиший хизмат кўрсатиш бинолари баро этиш борасидаги бизнес таклифи вилоятдаги мутасадди ташкилотлар томонидан ўрганилмоқда.  Агар лойиҳа амалга ошса, 100 киши мавсумий 50 киши доимий иш билан таъминланади.

Бахтигул Қаршиева,

O‘zLiDeP Самарқанд вилоят

 Кенгаши матбуот котиби

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!