O‘zLiDeP Сиёсий Кенгаши Ижроия қўмитасида “Энг намунали туман (шаҳар) партия ташкилоти” танлови давом этмоқда. Танловнинг қуйи босқичлари жорий йилнинг октябрь ва ноябрь ойларида ташкил этилган эди.

– Бошланғич партия ташкилоти фаолиятини бошқариш, депутатлик гуруҳлари билан ҳамкорликда ишлаш, қабул қилинаётган қонунлар, партия олий органларининг қарор ва фармойишларини бажарилишини тизимли йўлга қўйиш партия туман (шаҳар) Кенгашлари зиммасига катта масъулият юклайди, – дейди O‘zLiDeP Наманган шаҳар Кенгаши аппарат раҳбари Соҳиба Гаппарова. – Уларнинг иш фаолиятини янада ривожлантириш, ташкилий-партиявий ишларни тизимли йўлга қўйиш, мафкуравий соҳадаги фаолият самарадорлигини оширишга алоҳида эътибор қаратилмоқда. Шунингдек, қуйи бўғинлар ва O‘zLiDeP депутатлик гуруҳлари билан ҳамкорликда кичик бизнес ва хусусий тадбиркорликни ривожлантириш бўйича ҳам ҳамкорлик қиляпмиз. Натижада  минглаб ёшлар ўз бизнесини йўлга қўйиб, оиласи даромади ва мамлакатимиз ривожига ҳисса қўшмоқда.  

Ишонамизки, бу эзгу ишлар кейинги йилда ҳам давом этади. Зеро, янги йилни катта хурсандчилик, қувонч билан қарши оляпмиз. Танловдан келиб чиқиб, мавжуд имкониятлардан унумли фойдаланиш, депутатлик гуруҳлари фаоллигини ошириш, партия электорати билан ишлашда янгича услубларни қўллашни амалиётга татбиқ этишни галдаги устувор вазифа сифатида белгилаб олдик.

O‘zLiDeP матбуот хизмати