Хатирчи туманида ўз томорқасида экин-текин қилиб, баракали ҳосил олиб келаётган юртдошларимиз талайгина. Туман аҳолиси ер ва иқлим шароитидан келиб чиқиб, лалмикор, сув тақчил бўлган ҳудудларда полиз-сабзавот, боғдорчилик, узумчиликда яхши даромад олиш сирларини ўзлаштирмоқда.

O‘zLiDeP ҳудудий ташкилотлари томонидан “O‘zLiDeP бошланғич партия ташкилотлари ўз томорқасида фаолиятини бошлаганларга кўмакдош” лойиҳаси доирасида олиб борилаётган тарғибот ишлари натижасида ҳудудда ишбилармонлар сони тобора ортиб боряпти.

“Боғчакалон” маҳалласида яшовчи Мамаражаб Ҳошимов ҳам ўз томорқасида 1,8 сотихлик мўжаз иссиқхонасида помидор, яна 2 сотих ер майдонида картошка, пиёз ва бошқа сабзавотлар етиштирмоқда.

– Ўтган йили тижорат банкидан 7 миллион сўм имтиёзли кредит олиб, шу иссиқхонани қурган эдик ва шу йилнинг ўзида 6 миллион сўм соф фойда кўрдик, – дейди тадбиркор. – Айни чоғда ҳам иссиқхонамизда помидор экканмиз. Биринчи ҳосилни 6-7 миллион сўмга чамалаб турибмиз. Илгари ердан шунча фойда олиш мумкинлигига ишонмасдик. Томорқага меҳр бериб, фойдасини кўряпмиз.

Учрашув давомида тадбиркор мутасаддилардан оқава сувдан бироз қийналаётганини айтиб, шу муаммони ҳал этишда партия фаолларидан амалий ёрдам сўради.

Унинг мурожаатини халқ депутатлари туман кенгашидаги партия  депутатлик гуруҳи аъзоси Тоштемир Сафаров ўз зиммасига олиб, ижобий ҳал этиб берди.

Азамат САФАРОВ,

O‘zLiDeP Навоий вилоят

Кенгаши матбуот хизмати

O‘zLiDePнинг Facebook ва Instagram’даги расмий саҳифаси ҳамда Telegram’даги каналига аъзо бўлиб, сўнгги янгиликлардан хабардор бўлинг!