Тадбиркорлар ва ишбилармонлар ҳаракати - Ўзбекистон Либерал-демократик партияси фаоллари учун сайловларни ташкил этишда сиёсий технологиялардан фойдаланиш масалаларига бағишланган махсус вебинар ташкил этилди. O‘zLiDePнинг марказий ва ҳудудий сайлов штаблар вакиллари билан ташкил этилган ушбу вебинарни Европа сиёсий консультантлар ассоциацияси президенти, Халқаро сиёсий консультантлар ассоциацияси директорлар кенгаши аъзоси Игорь Минтусов ўтказди.

Маълумки, шу йил декабрь ойида Олий Мажлис Қонунчилик палатаси ҳамда маҳаллий кенгашларга депутатлик сайловлари бўлиб ўтади. Бугун соҳа мутахассилари, экспертлар томонидан бир жиҳат қайта-қайта таъкидланмоқда. Яъни бу галги сайловлар мутлақо янгича босқичда, янгича қарашлар асосида бўлиб ўтади. Ушбу ўзига хос жиҳатлар аҳолининг ушбу сайловларга бўлган қизиқиши билан белгиланади. Шундай бир вақтда албатта барча сиёсий партиялар ўз сайловолди дастурлари, ўз устуворликларини аҳолига етказишда замонавий, дунёнинг ривожланган давлатларида тажрибадан ўтган сиёсий технологияларни жалб қилган тарзда ишларни ташкил этиш муҳим аҳамият касб этади.

Ўтказилаётган вебинар ушбу вазифалардан келиб чиққан ҳолда ташкил этилди. Бугун дунёнинг ривожланган давлатлар, хусусан Европа давлатларида сайловлар жараёнида сайловолди штабларининг аҳоли билан алоқалар йўналишидаги ишларини самарали ташкил қилиш, партия устуворликлари, аҳолини ўйлантирган муаммоларни ҳал қилишда ушбу сиёсий кучнинг бошқа партиялардан ҳал қилувчи ёндошувлари, ушбу жараёнда ижтимоий тармоқлар ва бошқа коммуникация воситаларидан мақсадли фойдаланиш ва бошқа масалалар ушбу вебинарнинг асосий мазмунини ташкил этди.

Маъумот ўрнида айтиш мумкинки, партияга сайловларда яқиндан кўмак бераётган таниқли сиёсий консультант И.Минтусов ўз ўқувларини бевосита жойида, яъни Ўзбекистонга келиб сайловлар билан боғлиқ жараёнлар ҳамда ушбу сайловларда партиянинг иштироки билан боғлиқ жиҳатларни атрофлича қилган таҳлили, партия фаоллари билан доимий алоқалари асосида амалга оширмоқда. Бундай ўқувлар ва сиёсий консультацияларни бундан кейин ҳам партия штаби вакиллари, кейинчалик номзодлар билан ҳам ўтказиш режалаштирилган. 

O‘zLiDeP Матбуот хизмати