Фарзандлар таълим-тарбияси, ёш авлодни баркамол инсонлар этиб камолга етказишга алоҳида эътибор қаратиш халқимизга хос эзгу фазилатлардан. Халқимизнинг устоз отангдек улуғ, деган пурҳикмат нақлида ҳам ўқитувчи ва мураббийларга бўлган самимий эҳтиром намоён.

1-октябрь - Ўқитувчи ва мураббийлар куни умумхалқ байрами сифатида кенг нишонланиши аввало, ўзининг билим ва тажрибаси, истеъдод ва маҳорати, инсоний фазилатларини, кўз нури ва қалб қўри, бутун борлиғини аямасдан, маърифат йўлида беминнат хизмат қиладиган устоз ва мураббийларимизга нисбатан халқимизнинг азалий ҳурмат-эҳтиромининг яққол намунасидир.

Байрам муносабати билан Халқ депутатлари Маҳаллий Кенгаши депутатлари Олимхон Бабаханов ва Ғиёсиддин Бабахановлар ташаббуси билан Наманган шаҳридаги 43-15-46-22-сонли умумтаълим мактаблари, Наманган Педагогика коллежи ва 1-Давлат ихтисослашган мактаб интернатида машаққатли аммо шарафли касб эгалари бўлган устоз ва мураббийлар иштирокида учрашувлар ва маданий тадбирлар ўтказилиб, ёш авлодга билим ва маърифат дунёси сари йўл очиб берган, унинг қалбига юксак инсоний фазилатлар ҳиссини сингдириш йўлида заҳмат чеккан устоз ва мураббийларнинг олижаноб меҳнатига таҳсинлар айтилди.

Тадбирлар якунида бир гуруҳ ўқитувчи ва мураббийларга депутатларнинг байрам совғалари топширилди.