Эл-юрт юкини елкасида ҳансираб кўтариб юрган тадбиркорларимиз кўп. Ҳар доим ҳам улар  дардини дастурхон қилавермайди. Айтганим билан нима ўзгарарди, қайтанга гапим беҳуда кетади, деб ўйлайди.

Шу йилнинг 20 августида Президент Шавкат Мирзиёевнинг тадбиркорлар билан қилган очиқ мулоқоти бу каби ўй-хаёлларни улар қалбидан бутунлай олиб ташлади. Ўша очиқ мулоқотда тадбиркорлар эркин фикр юритишди, рости, бор дарду дунёсини тўкиб солишди. Қувонарлиси шуки, ҳар бир таклиф ёки фикр Президент томонидан инобатга олинди, ҳал этиш чора-тадбирлари кўрилиши айтилди.

2021 йил 27 октябрь куни Президентимиз томонидан имзоланган “Тадбиркорлик субъектларининг хорижий валютадаги кредит мажбуриятларини бажариш билан боғлиқ юкини камайтиришга оид қўшимча чора-тадбирлар тўғрисида” қарор ҳам айнан тадбиркорлар таклифлари эътирофи десак сира муболаға қилмаган бўламиз.

Қарор билан тижорат банклари томонидан тадбиркорлик субъектларининг валюта хатарларини камайтириш учун 1 миллион АҚШ долларигача миқдорда хорижий валютада ажратилган кредитлар миллий валютага ўтказиб берилаётганлиги мустаҳкамлаб қўйилди.

Тижорат банкларидан хорижий валютада олинган кредитлар миллий валютага ўтказилганда амалдаги компенсация тақдим этиш тўғрисидаги шартномалари мавжуд бўлган тадбиркорлик субъектларининг эквиваленти 1 миллион АҚШ долларидан, фоиз ставкаси Марказий банк асосий ставкасининг 1,75 бараваридан ошмайдиган кредитларнинг асосий ставкадан ошадиган, лекин 5 фоизли пунктдан кўп бўлмаган қисми бўйича фоиз харажатларини қоплаш учун Тадбиркорлик фаолиятини қўллаб-қувватлаш давлат жамғармаси томонидан компенсация тақдим этилиши белгиланди.

Албатта, бунда Жамғармага мазкур кредитлар бўйича амалдаги компенсациялар миқдорларини қайта ҳисоб-китоб қилиб, уларнинг умумий миқдорини мутаносиб равишда ўзгартиришига ҳам рухсат этилди.

Энг қувонарлиси эса 2021 йил 1 ноябрдан бошлаб Ўзбекистон Республикаси номидан чет эл валютасида тадбиркорлик лойиҳаларини молиялаштириш учун халқаро молия институтлари ва хорижий ҳукумат молия ташкилотлари маблағлари ҳисобидан жалб қилинган кредитлар лойиҳада иштирок этувчи молия ташкилотларига 10 йилдан кам бўлмаган муддатга ёки улар жалб қилинган муддатга қайта кредитланадиган бўлди.

Менинг назаримда тадбиркорлар Президент билан ўтказилган очиқ мулоқотни узоқ вақт эслаб юришса керак. Сабаби мазкур тарихий учрашувда билдирилган таклифлар, айтилган муаммолар бирин-кетин ҳал этилаяпти.

Тадбиркорнинг юки енгиллашаяпти. Бинобари, тадбиркорнинг юки қанча енгиллашса, элу юртга нафи шунча кўп тегади. Юрт тараққиёти ва равнақи учун уларнинг қўллаб-қувватлашнинг аҳамияти нечоғли муҳимлиги ана шу қарорда ҳам ўз аксини топган.

Ҳазратқул ХЎЖАМҚУЛОВ,

Олий Мажлис Қонунчилик палатаси депутати.