Ўзбекистон Республикаси Президентининг 2022 йил 25 октябрдаги “2022-2023 йилларда маҳаллалар инфратузилмасини янада яхшилаш бўйича қўшимча чора-тадбирлар тўғрисида”ги қарори ижросини таъминлаш борасида Зарбдор туманида ҳам бир қатор ишлар амалга оширилмоқда. Эътиборли томони, ушбу жараёнда халқ депутатлари туман Кенгашида фаолият олиб бораётган 11 нафар O'zLiDeP депутатлик гуруҳи аъзолари фаол иштирок этмоқдалар. Депутатлар бошчилигидаги ишчи гуруҳ аъзолари   бу борадаги муаммоларни ҳар томонлама чуқур ўрганиб, ўз хулосаларини бермоқдалар. Амалга оширилаётган ишлар тўлиқ депутатлик назоратига олинмоқда.

Фаол депутатларимиздан бири Баҳром Мусурмонов бошчилигидаги ишчи гуруҳ аъзолари “Навоий” МФЙ ҳудудидаги Беруний ва С.Аҳмад кўчаларида истиқомат қилувчи аҳолини тоза ичимлик суви билан таъминлашдаги муаммоларни тўлиқ ўрганиб чиқдилар. Ўрганишлар жараёнида  мазкур кўчаларга 4 км ичимлик сув тармоғи тортилиб, 2 та сув иншоатини реконструкция қилиш лозимлиги аниқланди. Мазкур лойиҳани амалга оширишга 1 млрд. 12 миллион сўм маблағ талаб қилинади.

Айни пайтда бу борадаги ишлар қизғин бошлаб юборилди. Демак, яқин кунларда мазкур кўчаларда истиқомат қилувчи аҳоли ҳам тўлиқ тоза ичимлик суви билан таъминланади. Иш жараёни депутатлик ва жамоатчилик назоратига олингани эса, амалга оширилаётган ишларнинг сифати кўнгилдагидек бўлишини таъминлаши шубҳасиз.

Зайниддин Эшқулов,

O'zLiDeP Жизах вилоят Кенгаши

Сиёсий таълим ва депутатлик

гуруҳлари билан ишлаш бўлими мудири.