O’zbekiston-Vengriya: hamkorlikni yanada kengaytirishga qaratilgan sa’y-harakatlar
06.10.2022, 10:29
Vengriya bilan O’zbekiston hamkorligi strategik xarakterga ega. O’zaro munosabatlarimizning mazkur xususiyati Vengriya bosh vaziri V. Orbanning 2021 yil mart oyida Toshkentga tashrifi yakunlaridan ma’lum bo‘lgandi. Shu tariqa Vengriya – O’zbekiston o‘zaro aloqalarni strategik darajaga olib chiqqan Yevropa Ittifoqining ilk mamlakatiga aylandi. Xalqlarimizning azaliy tarixiy aloqalari, mushtarak qadriyatlari va o‘xshash mentaliteti do‘stona munosabatlarni mustahkamlash uchun poydevor bo‘lib xizmat qilmoqda.
Prezidentimiz Shavkat Mirziyoyevning shu haftada Vengriyaga rasmiy tashrifi O’zbekiston va Vengriya o‘rtasidagi ko‘p qirrali strategik sheriklik munosabatlarini yanada kengaytirishdan har ikki tomonning ham manfaatdor ekanining yorqin dalili bo‘ldi hamda ikki mamlakat ishbilarmon doiralari va hududlari o‘rtasidagi hamkorlikning yangi yo‘nalishlari va aloqalari yo‘lga qo‘yilishini belgilab berdi. Xususan, uchrashuvlarda siyosiy, savdo-iqtisodiy, investitsiyaviy, moliyaviy-texnik va madaniy-gumanitar sohalarda hamkorlikni rivojlantirish istiqbollari muhokama qilindi.
Oliy darajadagi muzokaralarda savdo-iqtisodiy va investitsiyaviy hamkorlikni rivojlantirish ustuvor ahamiyatga ega ekani qayd etildi. Xususan, keyingi yillarda tovar ayirboshlash hajmi qariyb uch barobar oshdi. Shu bilan birga avtomobilsozlik, farmatsevtika, qurilish, qishloq xo‘jaligi, sayyohlik va tomonlarni qiziqtirgan boshqa sohalarda iqtisodiy diplomatiyani rivojlantirish katta ahamiyatga ega.
Bugungi kunda O’zbekiston va Vengriya o‘rtasidagi savdo aloqalari rivojlanishi uchun juda qulay muhit yaratildi. Hatto pandemiyaning salbiy ta’siriga qaramay, davlatlarimiz o‘rtasidagi tovar ayirboshlash hajmi 2020 yilda ham o‘sdi. 2021 yilda O’zbekiston va Vengriya o‘rtasidagi ikki tomonlama savdo hajmi 114,8 million dollarni, shundan eksport hajmi – 1,1 million, import hajmi esa 113,7 million dollarni tashkil etdi.
Joriy yilda O’zbekistonning Vengriyaga eksporti hajmining o‘sishi kuzatilmoqda. Shu yilning yanvar-avgust oylari yakunlariga ko‘ra, Vengriyaga eksport hajmi o‘tgan yilning shu davriga nisbatan 4,7 baravar oshib, 3,1 million dollarni tashkil etdi. Bugungi kunda O’zbekistonda vengriyalik sarmoyadorlar ishtirokida tashkil qilingan 10 dan ortiq korxona faoliyat yuritmoqda.
Bularning barchasi sherikchilikni yanada rivojlantirishga qaratilgan 10 dan ortiq hujjatlar, jumladan, Hududlararo hamkorlik to‘g‘risidagi hukumatlararo shartnoma, innovatsiyalar sohasidagi o‘zaro manfaatli aloqalar, qishloq xo‘jaligi, oziq-ovqat va chorvachilik sohalaridagi sheriklikni rivojlantirish bo‘yicha “yo‘l xaritasi”, suv xo‘jaligi bo‘yicha hamkorlik to‘g‘risidagi bitim doirasida amalga oshirilyapti. Shuningdek, hamkorlikning huquqiy asoslari ikki mamlakat bozorlariga mahsulotlar yetkazib berishni kengaytirish, o‘zaro savdodagi nomutanosibliklarni asta-sekin bartaraf etish hamda sanoat kooperatsiyasini rivojlantirish, Vengriyaning ilg‘or tajribasidan foydalangan holda farmatsevtika, kimyo, mashinasozlik, qishloq xo‘jaligi, chorvachilik, baliqchilik, kartoshkachilik kabi sohalarda muayyan loyihalarni amalga oshirishga xizmat qilmoqda.
3 oktabr kuni Budapeshtda bo‘lib o‘tgan, ikki mamlakat ishbilarmon doiralari vakillari ishtirok etgan O’zbekiston-Vengriya biznes-forumi ham katta ahamiyatga ega. Ushbu nufuzli tadbir investitsiyaviy va savdo-iqtisodiy hamkorlikni yanada rivojlantirishning asosiy sharti sifatida O’zbekiston va Vengriya tadbirkorlari o‘rtasidagi aloqalarni mustahkamlashga xizmat qildi.
Forumda Vengriya kompaniyalariga O’zbekistonning investitsiyaviy imkoniyatlari haqida batafsil ma’lumotlar taqdim etildi. O’zbekistonga 2021 yil aprel oyida GSP+ benefitsiar maqomi berilishi MDH va Yevropa Ittifoqi bozorlariga imtiyozli kirish imkoniyatiga ega samarali sanoat kooperatsiyasi zanjirlarini yaratishga shart-sharoitni vujudga keltiradi va bu imkoniyat Vengriyalik ishlab chiqaruvchilarda katta qiziqish uyg‘otdi. Ta’kidlash zarurki, O’zbekiston Yevropa Ittifoqining GSP+ preferensiyalar tizimiga qo‘shilgani o‘zaro savdoni salmoqli darajada ko‘paytirish va diversifikatsiya qilish uchun yangi imkoniyatlar ochadi.
Forum yakunlari bo‘yicha ikki tomonlama ko‘plab hujjatlar, investitsiyaviy bitimlar va eksport shartnomalari imzolandi. Ushbu hujjatlar O’zbekiston va Vengriya o‘rtasidagi iqtisodiy va investitsiyaviy hamkorlik ufqlarini kengaytiradi.
Muxtasar aytganda, mazkur tashrif har ikki davlatga hamkorlikning keng ko‘lamli yo‘nalishlari, jumladan, savdo-iqtisodiy aloqalarni mustahkamlash, ikki tomonlama investitsiyalarni ko‘paytirish, agrar sohadagi va moliyaviy aloqalarni kengaytirish hamda boshqa muhim masalalarni ko‘rib chiqish imkonini berdi.
Aktam Xaitov,
O‘zLiDeP Siyosiy Kengashi Ijroiya qo‘mitasi raisi
O'xshash yangiliklar
-
Saylovoldi dasturi ijrosi: parlament nazorati va fraksiyalararo raqobat
13.04.2024, 21:48
-
Jizzaxda tomorqalarni ishga solish bo‘yicha 309 ta mahallaga lider tadbirkor – eksportchilar biriktirilishi belgilandi
09.04.2024, 20:28
-
Jizzaxda kechayotgan ulkan o‘zgarishlar Yangi O’zbekistonni qamrab olgan bunyodkorlik jarayoniga munosib hissa bo‘lib qo‘shilmoqda
09.04.2024, 20:26
-
O’zbekiston va Qozog‘iston hamkorligi yangi bosqichga chiqmoqda
09.04.2024, 17:27
-
Yerdan samarali foydalanish - yoshlar bandligi va daromadini oshirishning muhim omilidir
09.04.2024, 17:19
Fikringizni qoldiring