Президентимиз Шавкат Мирзиёевнинг Олий Мажлис ва Ўзбекистон халқига йўллаган Мурожаатномасида депутатларга, сенаторларга бу муҳим сиёсий-ҳуқуқий ҳужжатнинг мазмун-моҳиятини,ундан келиб чиқадиган устувор вазифаларни кенг халқ оммасига, сайловчиларга  етказиш юзасидан топшириқлар берилди.

Биз, ўша куннинг ўзидаёқ тарғибот ишларини бошлаб юбордик.Аввало шуни мамнуният билан таъкидлаш жоизки, наманганликлар Президентимизнинг ушбу Мурожаатномасини катта қизиқиш ва юксак эҳтиром билан қабул қилдилар. Чунки Давлатимиз раҳбари ўз маърузаларида вилоятимизда тадбиркорликни, саноатни ривожлантириш бўйича  эришилаётган натижаларни алоҳида  таъкидлаб ўтдилар.

Хусусан, мамлакатимизда Самарқанд ва Наманган шаҳарларида аҳоли сони бир миллионга етиб,  улкан бунёдкорлик ишлари амалга оширилаётганлиги, шунинг учун  бу икки  шаҳарни алоҳида маъмурий-ҳудудий бирлик сифатида республика бўйсунувига ўтказишни таклиф қилганликлари барчамизга катта қувонч бағишлади. Биз ушбу ташаббуснинг моҳиятини,жумладан, вилоятимиз маркази янада обод бўлишини,қурилиш ишлари кўлами кенгайишини, аҳоли турмуш даражаси бунданда фаровон бўлишини мисоллар билан халқимизга тушунтиряпмиз.

Дарҳақиқат, Наманган шаҳри сўнгги беш йилда таниб бўлмас даражада ўзгарди, ҳар йили аҳолиси ўртача 25-30 минг нафарга кўпаймоқда. Кенг ва равон кўчалар, хиёбонлар, Президентимизнинг таклифи билан Наманган шаҳри таркибида Давлатобод ва Янги Наманган туманлари ташкил этилиши ҳам бежиз эмас. Сўнгги йилларда Наманган шаҳрида 300 дан зиёд кўп қаватли уйлар қурилиб, қарийб 65 минг фуқаро янги хонадон эгаси бўлди. Биргина “Янги Наманган” шаҳарчаси лойиҳасининг биринчи босқичида 330 гектар майдонда 8500 хонадонли 184 та янги уй-жой барпо этилади. Икки йилдирки, Намаганда халқаро миқёсда анъанавий гуллар байрами тадбирлари ўтказилмоқда. Қўшни республикалардан, хорижий давлатлардан ташриф буюрган меҳмонлар,сайёҳлар ҳам Намангандаги улкан бунёдкорлик ишларини эътироф этмоқдалар.

Шунингдек, Наманган шаҳрида саноат маҳсулотлари ишлаб чиқариш ҳажми, халқ истеъмол моллари, қурилиш ишлари, чакана савдо айланмаси, хизматлар ҳажми, бюджет даромадлари прогнозлари ортиғи билан бажарилмоқда. Бунга биринчи навбатда, шаҳар аҳолисининг тадбиркорлиги, ишбилармонлиги, қолаверса, давлат раҳбари ва ҳукумат томонидан хусусий бизнес ва тадбиркорликни қўллаб-қувватланиши ўз натижасини бермоқда.

Наманган шаҳрининг ўсиш нуқталари ҳисобланган кичик саноат зоналарини ривожлантириш ва уларнинг сонини ошириш борасида амалга оширилган ишлар натижасида биргина 2022 йилда умумий қиймати 2,3 триллион сўм бўлган 328 та лойиҳа амалга ошириляпти. Бу йўналишдаги ишлар бугун юртимизда “Наманган тажрибаси” сифатида эътироф этилмоқда ва кенг оммалашмоқда.

Бир сўз билан айтганда, Наманган шаҳрининг алоҳида маъмурий-ҳудудий бирлик сифатида республика бўйсунувига ўтказилиши Наманган шаҳри аҳолисининг турмуш шароитини яхшилашга, барча йўналишларда ривожланишнинг янги босқичга чиқишига кенг имкониятлар эшигини очади.

 Икромхон НАЖМИДДИНОВ,

Олий Мажлис Сенати аъзоси,

O’zLiDeP Наманган вилояти фахрийлар Кенгаши раиси