O’zaro ishonch va do‘stona aloqalar – taraqqiyot omili
25.01.2024, 14:22
Ayni kunlarda Prezidentimiz Shavkat Mirziyoyevning Xitoy Xalq Respublikasi Raisi Si Szinpinning taklifiga binoan 23-25 yanvar kunlari davlat tashrifiga oid voqealar rivojiga nafaqat dunyodagi yetakchi ommaviy axborot vositalari va tahlilchi ekspertlar, balki butun xalqimiz, keng jamoatchilikning diqqat e’tibori qaratilayotgani aslo bejiz emas.
Buning boisi shuki, ikki davlat o‘rtasidagi o‘zaro ishonch rishtalari jadal rivojlanmoqda va bu boradagi sayi-harakatlar xalqimizning chuqur e’tirofiga sabab bo‘lmoqda. Bu boradagi misollar va raqamlar ham ana shundan dalolat beradi. Masalan, ikki mamlakat o‘rtasidi imzolangan hujjatlarga ko‘ra, 2023-2027 yillarda har tomonlama strategik sheriklikni rivojlantirish dasturi amalga oshirilmoqda. Keyingi yillarda Xitoydan O’zbekiston iqtisodiyotiga investitsiyalar hajmi besh barobar, qo‘shma korxonalar soni esa uch barobar oshdi. 2024 yil 1 yanvar holatiga O’zbekistonda faoliyat yuritayotgan Xitoy kapitali ishtirokidagi korxona va tashkilotlar soni 2 337 tani tashkil etmoqda. Bu o‘tgan 2023 yilning 1 yanvariga nisbatan 196 taga ko‘p demakdir. Mamlakatimizning 2023 yildagi 62,6 milliard dollarlik tashqi savdo aylanmasida yuqori ulushga ega bo‘lgan hamkor davlatlar orasida Xitoy yetakchi bo‘lib, uning bu boradagi ulushi 14 milliard dollarni tashkil etdi.
Joriy yilning 24 yanvarida O’zbekiston Liberal-demokratik partiyasi Toshkent shahar kengashi hamda Toshkent irrigatsiya va qishloq xo‘jaligini mexanizatsiyalash muhandislari instituti milliy tadqiqot universiteti bilan hamkorlikda tashkil etilgan “O’zaro ishonch va do‘stona aloqalar – taraqqiyot omili” mavuidagi davra suhbati ayni shu tashrif va uning natijalarini o‘rganishga bag‘ishlandi.
Unda ta’kidlanganidek, O’zbekiston va Xitoy o‘rtasidagi hamkorlik aloqalari o‘rnatilganligiga 30 yildan oshdi. Yil sayin ikki mamlakat o‘rtasidagi o‘zaro siyosiy ishonch va do‘stona aloqalari izchillik bilan mustahkamlanib bormoqda. Xususan, 2017 yildan boshlab, mamlakatlarimiz o‘rtasidagi munosabatlar barqaror yuqori sur’atni namoyish etib, o‘z tarixidagi eng namunali davrga qadam qo‘ydi. O’tgan yetti yil davomida davlat yetakchilarining 8 marta uchrashuvi bo‘lib o‘tdi. 2022 va 2023 yillar davomida amalga oshirilgan o‘zaro davlat tashriflari yakunlariga ko‘ra 60 ga yaqin hujjat imzolangan bo‘lib, umumiy qiymati 40 milliard dollardan ortiq bo‘lgan savdo shartnomalari va investitsiya bitimlarini amalga oshirish bo‘yicha kelishuvlarga erishilgan edi.
Aytish mumkinki, bu galgi tashrif va uning doirasida erishiladigan ikki tomonlama shartnoma va bitimlar ham tarixi va sivilizatsiyalari mushtarak bo‘lgan O’zbekiston va Xitoy xalqlari hayoti yanada farovonlashishiga xizmat qiladi. 24 yanvar kuni Pekin shahrida O’zbekiston Respublikasi Prezidenti Shavkat Mirziyoyev va Xitoy Xalq Respublikasi Raisi Si Szinpinning rasmiy delegatsiyalar a’zolari ishtirokidagi muzokaralari, tashrif davomidagi uchrashuvlar va ular nihoyasida imzolangan ko‘plab hujjatlar ushbu jarayonni yangi bosqichga ko‘tarilayotganini yaqqol isbotlaydi.
TIQXMMI milliy tadqiqot universiteti va O’zLiDeP hamkorligida tashkil etilgan davra suhbatida ikki davlat rahbarlari tomonidan imzolangan O’zbekiston Respublikasi Hukumati va Xitoy Xalq Respublikasi Hukumati o‘rtasida atrof-muhitni muhofaza qilish, texnik-iqtisodiy va inson resurslarini rivojlantirish, kambag‘allikni qisqartirish, davlat ilmiy-tadqiqot muassasalari o‘rtasidagi aloqalarni kuchaytirish, Xitoy – Markaziy Osiyo – Yevropa temir yo‘l ekspresslari bo‘yicha hamkorlikni chuqurlashtirish, yangi elektr transport vositalari sohasidagi hamkorlikni rivojlantirish va 2024-2026 yillarda turizm sohasidagi aloqalarni yanada kuchaytirishga qaratilgan hujjatlar bu boradagi faoliyatning bardavom bo‘lishidan dalolat berayotgani alohida ta’kidlandi.
Qiyom Nazarov,
falsafa fanlari doktori,
professor
O'xshash yangiliklar
-
Saylovoldi dasturi ijrosi: parlament nazorati va fraksiyalararo raqobat
13.04.2024, 21:48
-
Jizzaxda tomorqalarni ishga solish bo‘yicha 309 ta mahallaga lider tadbirkor – eksportchilar biriktirilishi belgilandi
09.04.2024, 20:28
-
Jizzaxda kechayotgan ulkan o‘zgarishlar Yangi O’zbekistonni qamrab olgan bunyodkorlik jarayoniga munosib hissa bo‘lib qo‘shilmoqda
09.04.2024, 20:26
-
O’zbekiston va Qozog‘iston hamkorligi yangi bosqichga chiqmoqda
09.04.2024, 17:27
-
Yerdan samarali foydalanish - yoshlar bandligi va daromadini oshirishning muhim omilidir
09.04.2024, 17:19
Fikringizni qoldiring